Ivon’ny fankalazana ny faha-150 taona : napetraka ny vato fehizoron’ny Tranom-bakoka sy Arsiva
Taorian’ny fotoam-pivavahana niarahana tamin’ny Foibe FJKM sy ny Synodam-paritany ary ny faritra Avaratr’Andohalo, dia niroso tamin’ny fametrahana ny vato fehizoron’ny Tranom-bakoka sy Arsiva izay kasaina hatsangana eo amin’ny tokontany avaratry ny fiangonana FJKM Ambavahadimitafo.
Sekretera Jeneralin’ny FJKM :
Amin’ny Anaran’ny Jesoa Tompo izay miantoka ny fitohizan’ny fiainan’ny fiangonana, Izay niteny hoe « Eo ambonin’ity vatolampy ity no hahoriko ny fiangonako » dia mametraka izao vato fehizoro hanaovana ny trano hitahirizana ny vakoka sy ny arsivan’ny FJKM Ambavahadimitafo. Amin’ny anaran’Andriamanitra Ray Zanaka Fanahy Masina, homban’Andriamanitra anie ny asa atao eto sy ny mpiasa eto, ka ho fifaliantsika ny fitokanana azy amin’ny ho avy
Synodam-paritany :
Araka izay efa nolazain’ny Sektretera Jeneraly izay, dia manamafy izany ny Synodam-paritany Antananarivo Atsinanana, ka mirary ny hahavitan’ny asa an-tsakany sy an-davany ho voninahitr’Andriamanitra
Mpitandrina Rakotoniera Eric :
Amin’ny anaran’i Jesoa Kristy lohan’ny fiangonana no hametrahana ny vato fehizoron’ny tranom-bakoka sy arsivan’ny FJKM Ambavahadimitafo. Ka ho fiangonana fianarana ho an’ny fiangonana rehetra ka santatra ihany ny an’Ambavahadimitafo fa ny fiangonana manontolo amin’ny FJKM dia hanana ny tranom-bakoka sy arsiva izany ho azy koa. Ho an’Andriamanitra irery ny voninahitra
Fanokafana ny takelaka
Ny Synodam-paritany kosa no namarana ny fotoana tamin’ny fanokafana ny takela-pahatsiarovana
no images were found
Fampirantian’ny Vaomieran’ny Tantara niarahana tamin’ireo ankizy tao amin’ny Sekoly Taninketsa
Tao aorian’ny fametrahana ny takela-pahatsiarovana dia niakatra tao amin’ny Akany Ralibera Daniel ny kristianina nanatrika ny fampirantiana nokarakarain’ny Vaomieran’ny Tantara
Ny ankizy tao amin’ny Sekoly Taninketsa kosa no nikalo hira fiderana nandritra izany.
Fiaraha-misakafo tao amin’ny Akany Ralibera Daniel
Tao aorian’izany dia niroso tamin’ny fiaraha-misakafo notanterahina tao amin’ny Akany Ralibera Daniel ny fotoana, ka ireo mpikambana tao amin’ny Antoko Mpihira Ambavahadimitafo no nanafana ny fotoana tamin’izany, niaraka tamin’ireo mpitandrina samihafa manana talenta manokana tamin’izany
