Aloky ny fahasambarana (part 1)

Sambatra! iza? Faniriako ny ho sambatra asa koa aloha ianao? Fa sambatra manao ahoana ary sambatra amin’inona? Ary na na iza na iza no miaina eto an-tany dia samy mikatsaka izany , hoy ny hafa sambatra ry anona fa manana izao na manana izary, ao koa ny hoe sambatra ry zareo fa nahazo izao na nahazo itsy.

Azo apetraka ny fanontaniana hoe : f’ianao angaha izao mahatsapa ny tenanao hoe mijaly? Inona no tsy maha-sambatra anao?
Tsarovy anefa fa ny hahasambatra anao no tanjon’Andriamanitra ary raha mbola manana fofon’aina ary mbola velona dia tsarovy fa sambatra raha samy sambatra ianao.

Andeha ange ho henoina sy harahina ny tantaran’ireto ankizivavy kely roa ireto izay mitsiriritra ny ho sambatra nefa na ny lehibe koa aza mety hitsiriritra toa azy ireo.

Tafapetraka teo amin’ilay vatolampy mitodika miankandrefana eo ambonin’ny tananan’Antananarivo ireto roa vavy kely indray harivariva.
Indro nisy voron-kely teo aloha ka finaritra ery nihinana ilay ravin-kazo nipetrahana, vaky ary ny resaka vokatr’izany.

LILA : sambatra aky io voron-kely io fa tsy mba miasa na mitady vola fa tonga dia mihinana izay hitany eh !

BAHOLY : sambatra koa ry zareo fa afaka mandeha n’aiza n’aiza, indrindra fa raha ho any an-dafy, raha mba vorona mantsy isika efa tsy teto intsona aho !
Nony avy eo lasa ilay vorona,vao niainga anefa izy dia nampijalian’ilay hitsikitsika tsy namelany mihitsy.

BAHOLY : ary toa tsy sambatra ihany izy ; toa mijaly daholo kay rehefa kely ; raha andeha ho any an-dafy izany iny tsy ho faty irery eny eny an-dalana eny.

LILA : mety misy mamono, ary mety ho reraka koa.
Samy nalahelo teo izy roa , ary gina tsy nisy nahateny, variana indray izy roa nijery ny jiron’ny hariva ary indrindra ny nahita ny fiara mitandahatra, raikitra indray ny resaka.

LILA : sambatra ery izao ireny olona manana tômôbila ireny.

BAHOLY : ie ! sady afaka mandehandeha lavitra, raha sady mihinan-kanina ao anatiny no mihaino hirahira, dia manao akanjo tsara be.

LILA : sady ireo koa sambatra ery manana trano tsara be eh !

BAHOLY : nefa toa tsy sambatra indray hono raha manan-karena loatra fa sao dia misy manafika.

LILA : dia aleo ve izany ho mahantra ihany ? dia hijaly foana izany.

BAHOLY : hono hoy aho ! f’angaha moa isika tsy sambatra eh !

LILA : eny hoy aho ! isika samy manana Dada sy Neny, manana trano, miakanjo toa mitovy amin’olon-drehetra ihany.

BAHOLY : hitako
Tampoka teo, indro nisy lehilahy be volom-bava teo aorianan’ izy roa. Taitra mafy izy roa sady nangovitra fa heveriny ho mpangala-jaza.
Nanatona ilay rangaha no sady nanontany ka nilaza hoe : « efa ela no teto aorianareo teto ary reko daholo ny resaka nifanaovanareo teo ». Nanontany azy ilay rangaha hoe  » ianareo angaha te ho sambatra mafy eh ? « 

Mbola hitohy…