FJKM Ambavahadimitafo

Fiangonan'i Jesoa Kristy eto Madagasikara

Toriteny 23 janoary 2011 – alahadin’ny zanak’ampielezana

Toriteny 23 janoary 2011 – alahadin’ny zanak’ampielezana

Publié le 03 mars 2011 à 09:03

Rehefa hanao trano ny olona iray dia efa mieritreritra mialoha izy hoe hatao inona io trano hatsangany io. Hatao ipetrahana ve? Hatao hotely ve?Sa fivarotana? Sa fiangonana? Dia araka izany no anaovany ny planin’ilay trano. Andriamanitra koa raha vao namorona ny olombelona dia efa nieritreritra izay mba nikendreny ny olona. Andeha iarahantsika mijery anio ny hoe: noforonin’Andriamanitra hanao inona moa isika olombelona?

« Fa asany isika, voaforona tao amin’i Kristy Jesosy mba hanao asa tsara, izay namboarin’Andriamanitra rahateo mba handehanantsika eo aminy. » – Efesiana 2:10 –
Io andininy io no ifotorantsika anio saingy ataontsika lafika hanampy izany  ny andininy 1 hatramin’ny andininy faha – 10; tsy afa-misaraka mantsy ireo.

I – Andriamanitra no namorona ny olona

Inona moa no hevitry ny hoe: “asany isika…” (10). Vokatra hita maso porofon’ny asa nataon’Andriamanitra isika olona, asan’ny tànanan’Andriamanitra ny olona no tiana ambara amin’ny hoe “asany isika”. Ny olombelona dia porofo mivainga ilazana fa nisy asa nataon’Andriamanitra, nisy zava-bitan’Andriamanitra. Tsy hoe: vitan’i Dada sy Neny” fa vitan’Andriamanitra, vita Nanahary. Tsy ilay lazaina hoe zava-boary nivoatra nivoatra ka tonga olona isika. Ary dia misy tsy misalasala akory miteny fa ny rajako sy ny babakoto no dadabeny.
Asan’Andriamanitra hatramin’ny taloha ny olombelona.
Toy inona no amaritan’i Apostoly Paoly izany olona asan’Andriamanitra
izany eto emin’ity Efes.2:1-10 ity?

I.1.– Hita ao aminy ny sarin’Andriamanitra

Ny olona voalohany noforonin’Andriamanitra avy tamin’ny vovoka dia olona tahaka ny endriny, tahaka ny tarehiny, ary dia Andriamanitra ihany no nahita fa “tsara indrindra izany” (Genesisy 1:31). Tany am-piandohana izany.
Dia notsofin’Andriamanitra rano i Adama sy Eva hiteraka olona tahaka ny endriny azy ihany. Nivoaka avy tao an-kibon-dreniny avy ny olona tsirairay. Na niditra tao amin’ny olona kosa aza ny ota araka ny voalaza ao amin’ny Genesisy toko faha-3, dia tsy niala akory ilay endrik’Andrimanitra tao aminy saingy teraka miaraka amin’ny ota kosa ny zaza rehetra nateraky ny olombelona hatreo. “Indro, tamin’ny heloka no niterahana ahy, ary tamin’ny fahotana no torontoronina ahy ny reniko,” hoy ny Salamo faha-51 andininy faha-5. Izao no tian’izany ambara: mpanota hatrany an-kibon-dreniny izaho sy ianao.
Mpanota isika tsirairay avy, kanefa na izany aza mbola ASANY ihany isika:

I.2.– Manjaka ao amin’ny olona ny ota

Tena mbola eo amintsika tokoa ny sarin’Andriamanitra na dia miara-teraka amintsika ihany koa aza ny ota sy ny faharatsiana samihafa. Mahazo vahana na nomen’ny olona toerana onenany ao anatiny ny ota dia manjary izy no manjaka sy  tsy mamela azy hifandray sy hiarakaraka amin’Andriamanitra nanao azy. Izany no antsoin’ Paoly
Apostoly eto hoe “zanaky ny tsy fanarahana” Ary io ota io no mitondra ny olona hanaraka “ny danin’ny nofo sy ny saina” (2) fotsiny.

Maloky ny ota ilay endrik’Andriamanitra ao amin’ny olona ka lasa “zanaky ny fahatezerana toy ny sasany koa isika”(3), hoy ihany ny filazan’i Paoly Apostoly azy eto. Dia ho zanaky ny fahatezerana lava ve ny olona? Tsy ho hita ato amiko sy ao aminao intsony ve izany ilay hoe: “tsara indrindra”? Inona ary no nataon’Andriamanitra manoloana ny asany “tsara indrindra” nanjary simba noho ny ota?

II.– Namorona olona vaovao tao amin’i Kristy Andriamanitra

Tsy navelany ho very any fotsiny ilay olona nanota teo. “Satria asany

…Voaforona tao amin’i Kristy Jesoa ” (Efesiana 2: 4—10)
Inona no antony manesika an’Andriamanitra hanavotra ny olona avy tamin’ny ota?

II.1.– Asesiky ny fitiavana Andriamanitra

Fa naninona raha navela ho very any satria sitrapon’ny olona anie ny nanota e? Andeha hiarahana mijery Ilay Andriamanitra nanao antsika. Manan-karena famindram-po Izy ary nitia antsika tamin’ny fitiavana lehibe, hoy Soratra Masina eto amin’ity Efesiana 2: 4 ity.
Tian’Andriamanitra anie ny olona e! Eny na dia fony mbola tao anatin’ny fahadisoantsika aza isika, na dia tsy manam-pitiavana avaly Azy aza isika dia TIA antsika io Andriamanitra Nahary antsika io .
Nahoana ary no tiany isika? Azo hazavaina ve ny fitiavana? Satria asany isika, fa Andriamanitra no nanao antsika, tahaka ny tarehiny isika dia olona tiany ifandraisana, tiany ho namana, tena namana akaiky Azy tokoa. Tiany ho lasa namany be, hoy ny fitenin’ny zazakely azy. Izany no manesika Azy hanavotra ny olona tamin’ny alalan’i
Kristy.

II.2.– Nanavao antsika ao amin’i Kristy

Izao no nataon’Andriamanitra noho isika tiany loatra: novelominy niaraka tamin’i Kristy izaho, ianao koa, efa maty, voaheloka ho faty izaho sy ianao, noho isika mpanota, nefa dia nomeny aina tao amin’i Kristy indray mba ho velona, iray (1) izay; niara-natsangany amin’i
Kristy, nalainy avy tao amin’ny fanjakan’ny ota dia natsangany hivoaka avy tamin’ny fahafatesana miaraka amin’i Kristy, roa (2) izay, ary angaha izay ihany, niara-napetrany any an-danitra ao amin’i Kristy Jesoa, lasa any amin’ny avo, miara-monina amin’i Kristy, iray voninahitra Aminy. Sady efa any an-danitra miaraka amin’i Kristy ianao
no mbola ety an-tany koa,  telo (3) izay. Any an-danitra any anie no fonenantsika rehefa manaiky ny hovonjen’i Kristy isika e! Ho mponin’ny lanitra no nanaovan’Andriamanitra ahy sy ianao.
Izay no asa nasain’Andriamanitra novitain’i Kristy teo amin’ny hazofijaliana ho ahy sy ho anao, izay no atao hoe: fahasoavana na famonjena nomena tolo-botsotra ho anao. Atolotra ho anao tsy misy takalony, tsy misy ezaka na asa takiana aminao vao omena anao, fa
raisinao amin’ny finoana. Vitan’Andriamanitra ny manavao ny fiainanao raha omenao toerana onenany ao anatinao i Kristy.

Inona ary hoy ianao no ifandraisan’izany famonjena nataon’i Kristy amin’ny  hoe Andriamanitra no namorona antsika olona ho tahaka ny
endriny?

III.– Efa namaritra lalana alehan’ny olona Andriamanitra

Miova sata ianao rehefa nandray amin’ny finoana an’i Kristy. Satria:
“Raha misy olona ao amin’i Kristy dia olom-baovao izy” hoy ny Baiboly.

III.1.– Nanomanan’Andriamanitra asa tsara hatao ny olona

“Mba hanao asa tsara, izay namboarin’Andriamanitra rahateo…” ?
Miaraka mahita isika eto fa asa tsara no lazain’ny Baiboly eto fa tsy hoe asa soa. Inona ary no atao hoe asa tsara? Iza moa no tsara sady mpanao ny tsara? Tsy Andriamanitra ve? Izay asain’Andriamanitra atao no atao hoe: “asa tsara”. Efa noeritreretin’Andriamanitra fony ianao vao noforonina ny fiainanao dia ny mba hanao asa tsara. Afaka manatanteraka izay tian’Andriamanitra ianao rehefa nandray ilay fiainana vaovao nomen’i Kristy anao. Amin’ny fiainana Kristiana dia tsy mifanipaka fa zavatra roa mifamatotra ny
fiainana sy ny asa atao. Tian’Andrimanitra ny “handehantsika ao amin’i Kristy.”

III.2.– Mandeha tahaka an’i Jesoa

Mba hampahazava tsara ny resaka dia handeha hojerentsika Kolosiana 1: 10 “mba handehananareo miendrika ny Tompo, hanaovana ny sitrapony amin’ny zavatra rehetra, dia mahavokatra amin’ny asa tsara rehetra sady mitombo amin’ny fahalalana tsara an’Andriamanitra,…”

Mifamatotra ny asa ataontsika sy ny  fiainana iainantsika. Ilay teny hoe handeha miendrika ny Tompo dia midika hoe: mandeha tahaka ny Tompo, manao ny asa nataon’i Jesoa. Tena fieritreritra ny teny nataon’i Jesoa indray mandeha manao hoe: “Izao no asan’Andriamanitra, dia ny hinoanareo Izay nirahiny.” (Jaona 6:29). Inona araka izany no
asa asainy hataontsika?
Tena fototra iorenan’ny asa tsara ataontsika ny fandraisantsika ny fiainana vaovao omen’Andriamanitra antsika ao amin’i Kristy. Amin’izay dia tsy zava-bita aseho an’Andriamanitra mba hahazoana famonjena ny asa ataontsika fa mba ho asa hitan’Andrimanitra fa asa tsara nataon’ny olom-baovao miaraka amin’i Kristy.

Noforonina hanao asa tsara ny olona (ireo asa nasain’Andriamanitra atao) nefa noho ny ota dia nanjary asa ratsy no nataony ary dia mila alana tao amin’ny ota izy mba hiverenany indray amin’ny làlana itarihan’i Kristy azy. Rehefa mifampikasokasoka na mifandray sy
miara-miasa amin’Andriamanitra eo ny mpino dia manjary miha-mifankalala ny roa tonta. Mandroso amin’ny asa tsara ny olona fa miaraka amin’izay koa ny eritreritr’Andriamanitra hatrany am-boalohany namoronany ny olona dia ny hahatonga ny  fahalalan’ny olona
an’Andriamanitra hihalalina hatrany. Izany indrindra no tao an-tsain’ny Apostoly Petera raha nampahery ny kristiana eo am-piandrasana ny fiavian’ny Tompo indray izy manao hoe: “fa mitomboa amin’ny fahasoavana sy ny fahalalana an’i Jesosy Kristy, Tompontsika
sy Mpamonjy”. (2 Petera 3:18) Ary dia tononiko ho anareo koa izany firarian-tsoa izany.

Ho Azy anie ny voninahitra ankehitriny sy mandrakizay. Amena.

RAHARINORO Ny Hasina, Mpitandrina


Lire aussi

18/02/2024 A la une . Fanompoam-pivavahana . Toriteny

Ilay zanaka adala

Alahady 18 Febroary 2024, alahady voalohany @ vanim-potoanan’ny karemy, mbola hibanjinana ny lohahevitra hoe « Mampitandrina @didiny Andriamanitra« , natokana hitondrana am-bavaka ny Arsiva sy tranom-bakoka manerana ny FJKM. Ny mpitandrina miza-draharaha Andriamifidy Miora no nitondra ny tenin’Andriamanitra araka ny Lioka 15 : 25-32 «  25Fa tany an-tsaha ny zanany lahimatoa; ary nony nody izy ka mby

11/02/2024 A la une . Fanompoam-pivavahana . Toriteny

Andeha hiaina @ fahamarinana

Alahady 11 febroary 2024, alahadin’ny Baiboly, mbola andinihina ny lohahevitra hoe « Mampitandrina @didiny Andriamanitra« , izay nitondran’ny mpitandrina Andriamasinoro Fidimalala ny hafatr’Andriamanitra araka ny Matio 5:20  » Fa lazaiko aminareo: Raha tsy mihoatra noho ny an’ny mpanora-dalàna sy ny Fariseo ny fahamarinanareo, dia tsy hiditra amin’ny fanjakan’ny lanitra mihitsy ianareo « 

04/02/2024 A la une . Fanompoam-pivavahana . Toriteny

Fankalazana ny faha-40 taonan’ny Asa fitoriana Filazantsara ho an’ny Zatovo sy Ankizy

Alahady 04 Febroary 2024, ankalazana ny faha-40 taonan’ny Asa fitoriana Filazantsara ho an’ny Zatovo sy Ankizy (AFFA), ka andinihin’ny FJKM lohahevitra vaovao @ity volana ity manao hoe « Mampitandrina amin’ny didiny Andriamanitra« . Ny mpitandrina Ranaivoson Andry no nitondra ny hafatr’Andriamanitra araka ny Jeremia 1 : 4-8 « Tonga tamiko ny tenin’NY TOMPO hoe:5Hatry ny fony ianao tsy

28/01/2024 A la une . Fanompoam-pivavahana . Toriteny

Fanokafana ny Jobily faha-75 taonan’ny Sampana Mpanazava sy Tily

Alahady 28 janoary 2024, fanokafana ny Jobily faha-75 taonan’ny Sampana Mpanazava sy Tily (SAMPATI), mbola andinihin’ny FJKM ny lohahevitra hoe « Lehibe ny voninahitry ny Tompo ». Ny mpitandrina Ranarimalala Nirina Harisoa no nitondra ny hafatr’Andriamanitra araka ny Matio 5 : 16 : « 16Aoka hazava eo imason’ny olona toy izany koa ny fahazavanareo mba hahitany ny asa

16/01/2024 A la une . Antso sy filazana

Hafatra ho an’ny Mpandray – fifidianana Diakona 2024

Mifarana ny alahady faha-28 janoary 2024 ny fanavaozana ny karatra hiatrehana ny fifidianana Diakona. Hamarino ary fa any aminao ny karatra maha-mpandray miloko fotsy. Raha toa tsy mbola manana ianao dia ento ny sary roa ny alahady faha-28 janoary hahafahana manavao ny karatrao.

14/01/2024 A la une . Fanompoam-pivavahana . Toriteny

Ny lanitra mamangy ny tany

Alahady 14 Janoary 2024, mbola andinihantsika ny lohahevitra hoe « Lehibe ny Voninahitr’Andriamanitra« , ka nitondran’ny mpitandrina miza-draharaha, Andriamifidy Miora, ny hafatr’Andriamanitra araka ny Lioka 9 : 28-36 Ny niovan’i Jesosy tarehy tao an-tendrombohitra.Mat. 17.1-13;Mar. 9.2-13.28ARY rehefa tokony ho havaloana taorian’izany teny izany, dia nitondra an’i Petera sy Jaona ary Jakoba Izy ka niakatra tany an-tendrombohitra hivavaka. 29Ary

07/01/2024 A la une . Fanompoam-pivavahana . Toriteny

Manavao ny fiainantsika Jesoa, manome fandresena ho antsika Jesoa

Alahady 07 Janoary 2024, alahady voalohany @ity taona ity, andinihina ny lohahevitra hoe « Lehibe ny voninahitr’Andriamanitra« , ka nitondran’ny mpitandrina John Rakotonirainy, SG ny FJKM, ny hafatr’Andriamanitra araka ny Matio 19 : 27-29 «  27Dia namaly Petera ka nanao taminy hoe: Indro, izahay efa nahafoy ny zavatra rehetra ka nanaraka Anao; koa inona ary no ho

31/12/2023 A la une . Fanompoam-pivavahana . Toriteny

Andriamanitra miandàny @ olony

Alahady 31 desambra 2023, alahady farany @ taona 2023, anatin’ny lohahevitra hoe « Ankalazao ny Mpamonjy« , nitoriana ny tenin’Andriamanitra araka ny Isaia 26 : 11-15  » 11Jehovah ô, avo ny tananao, nefa tsy jeren’ireo; Tsy maintsy hojereny ihany anefa ny  fahasaro-piaronao amin’ny olonao, ka ho menatra izy; Eny, afo no handevona ny fahavalonao. 12Jehovah ô, manorina fiadanana

25/12/2023 A la une . Fanompoam-pivavahana . Toriteny

Noely 2023 : Jesoa Kristy dia Mpanjaka

Krismasy 2023, Arahaba ry ilay nohasoavina, ny Tompo momba anao, « Ankalazao ny Mpamonjy ». Ny mpitandrina Prezida Synodaly Antananarivo Atsinanana, ALIOLIHARIMANARIVO Mahabo Saotra mpitandrina no nitarika sy nitondra ny hafatr’Andriamanitra araka ny Isaia 11 : 1-10 : Ny amin’ny famonjena hataon’Ilay Solofon’i Davida, sy ny hira fiderana hatao amin’izany1Ary hisy Solofo mitsimoka eo amin’ny fototr’i Jese,

24/12/2023 A la une . Fanompoam-pivavahana . Toriteny

Endre ny halalin’ny harena sy ny fahendren’Andriamanitra ary ny fahalalany!

Alahady 24 Desambra 2023, alahady farany @ advento @ity taona ity, ibanjinana ny lohahevitra hoe « Ankalazao ny Mpamonjy ». Ny mpitandrina miza-draharaha Andriamifidy Miora no nitondra ny hafatr’Andriamanitra araka ny ROmana 11 : 33-36 « 33Endre ny halalin’ny harena sy ny fahendren’Andriamanitra ary ny fahalalany! Tsy hita lany ny fitsarany ary tsy azo fantarina ny lalany! 34Fa