FJKM Ambavahadimitafo

Fiangonan'i Jesoa Kristy eto Madagasikara

Ny sitrapon'Andriamanitra

Ny sitrapon'Andriamanitra

Publié le 10 novembre 2008 à 12:11

Inona moa no anirian’Andriamanitra antsika. Tadiaviny ho inona isika? Kendreny hanao ahoana? Inona no sitrapony amintsika?

Maro no fikasany, ka izany rehetra izany dia ny hahasoa antsika. Na ireo heverintsika ho mangidy sy mampirotsa-dranomaso ; na ireo tsy maintsy hotazana eo am-pototry ny hazofijaliana, ets… dia fitiavana antsika avokoa ka ikendrena hanoloram-pahasoavana antsika.
Irin’Andriamanitra ho inona aho?
Fanontaniana mendrika hodinihina izany, ka rehefa fantatra ny valiny dia iezahana ho tratrarina.

Indreto misy telo hambara avy amin’ireo maro anirian’Andriamanitra antsika.

Voavonjy : Tian’Andriamanitra ho voavonjy isika. Izany no zava-dehibe aminy, izany no makadiry, izany no voalohany. Raha lavo ny olombelona dia nampanantena Mpamonjy ho azy izy. Hevero kely izay nataon’Andriamanitra : nomeny ny Zanany Lahy Tokana. Fatratra izany! Takatrao moa ve ny fiezinezin’izany? Iza no mahatratra izay ambaran’izany? Iza no mahalanja ny vesany, ary zovy no mahalaza ny soa ao aminy? Izany no mahagaga sy ngeza ary ambony indrindra amin’izay nataon’Andriamanitra mba hahavonjy antsika.

Tsy mbola nisy toy izany ary tsy hisy fanindroany. Ny Zanaka indray, mba hahalavorary ny famonjena antsika, dia nietry tena, nandefitra nampianatra sy nitory, nanao soa, tsy nanana izay hipetrahan’ny lohany, nolavina, nenjehina, nosamborina, nisetrasetrana, fadiranovana tao Getsemane, nijaly tany Gologota, maty tao Kalvary, ets…

Nofoanany ny tenany. Tsy nijanona tamin’io fototra lehibe io fa mbola miasa hatrany hatrany mandraka ankehitriny hahavoavonjy antsika. Ai-mpaminany firy, ain’Apostoly firy no ritra sy lany nentina nitory io fitiavan-dehibe io? Vola firy tapitrisa no voriana sy laniana isan-taona eran’izao tontolo izao hampielezana ny tenin’ny famonjena? Baiboly, toriteny, gazety fampianarana, fotoam-pivavahana. Zava-nitranga, ets… izany rehetra izany mbamin’ny marobe tsy voalaza dia hahavoavonjy anao sy izaho.

Azo ambara fa ny raharaha lehibe heverin’ny any an-danitra, ary ny iray amin’ny goaibe ikatrohana eto an-tany, omban’ny fifonan’i Jesosy Tompo eo ankavanan’ny Rainy, dia ny hanatanteraka ny famonjena antsika.

Koa ny sitrapon’Andriamanitra ary dia ny hahavoavonjy antsika.

SAMBATRA : Io koa no tian’Andriamanitra ho antsika. Vantanina fa noharina ho sambatra isika ary natao ho tretrika sy noforonina hiadana. Mivezivezy ny olona ka mankatsy, mankaroa, mikaroka fahasambarana, ary mandrakariva ao amin’izay tsy misy no itadiavany izany. Migoka ny ranon’i Sykara, ka mangetaheta lava eny. Ny sambatra ambara eto dia tsy ireo ataon’izao tontolo izao hoe sambatra dia ny manan-karena, be vola, manana trano soa, ambony ets… Tsy ireo. Tsy mba zavatra ivelany no mahay mahasambatra antsika. Ao amin’Ilay efa nomena antsika ihany. Io no mahasambatra antsika. Izany no iray amin’ny anton-diany. Ny fiadanako no omeko anareo, hoy Izy. Jesosy no ilay manome mihoatra ilay fahasambarana very tany Edena fahizay.

Ny fifankazarana amin’ny Tsitoha no hampiadana antsika, ary ny fandraisana an’i Kristy honina ao am-po : izay no tena fahasambarana. Averina kely ny voalaza fa tsy misy zava-tsoa eto hahay hampiadana antsika, fa raha olona afa-pon’ny zavatra eto an-tany isika, ka mety ho sambatra tanteraka amin’ireo dia olona mietry isika.

Tsy nofo fotsiny isika, fa fanahy, ka tsy afaka hahasambatra na inona na inona izany eto. Izany no ambara tsotra : ao amin’ny tsy misy Jesosy, mahaleo monina Azy, eny, izay foana Kristy, na firenena izany, na fon’olona tsirairay dia tsy misy fahasambarana.

Tian’Andriamanitra ho sambatra isika na eto na ary, ka omeny ny Zanany honina ao amintsika hahasambatra antsika.

MASINA : Io no hambara farany sady izany no hahalavorary iretsy roa voalaza eo ambony ; fa raha tsy misy firaisana aminy dia sarotra andrandraina ny famonjena sy ny fahasambarana, ary raha tsy masina indray isika dia tsy misy firaisana. Irin’ny Tompo ho masina isika, ataovy ao an-tsaina izany, ary alenteho lalina ao am-po. Mandrakariva hadinontsika io zava-dehibe io.

Tsarovy fa tsy maintsy ho masina isika. Hoy ny Tompo : « Ho masina hianareo, satria masina Aho« . Fatratra ny Fitiavan’Andriamanitra antsika : ety isika iriny honenana, fa efa nanomanany fonena-mahasambatra ka hahita ny tavany. Tsy hiditra any anefa isika, raha tsy masina ; eny tsy hahita ny Tavan’ny Tompo raha tsy manana fahamasinana. Koa satria Kanana fahizay dia nampanantenainy fa homena ny taranak’i Abrahama ; izay kosa ny lanitra natao ho an’ny olombelona ; nefa izay tsy masina tsy mba ho any (Apok. 21:27 ; Heb. 12:14).

Tian’i Kristy ho Masina ny Azy ka hamasininy (Jao. 17:19), ka na mbola eto amin’ity fiainana ity aza, dia efa manana ny taratry ny lanitra efa manana Paradisa sahady, ka masina, tsy anjakan’ny loto na izay tsy madio, sambatra, satria voaroaka ny ratsy, foana ny fitiavan-tena, ary nandresy ny fitiavana, ka indro fa voavonjy! Ry Malagasy ô! Tian’Andriamanitra ho voavonjy isika, iriny ho sambatra isika, tadiaviny ho masina isika! Izany no Sitrapon’Andriamanitra

Paul RAKOTOARIVONY


Lire aussi

18/02/2024 A la une . Fanompoam-pivavahana . Toriteny

Ilay zanaka adala

Alahady 18 Febroary 2024, alahady voalohany @ vanim-potoanan’ny karemy, mbola hibanjinana ny lohahevitra hoe « Mampitandrina @didiny Andriamanitra« , natokana hitondrana am-bavaka ny Arsiva sy tranom-bakoka manerana ny FJKM. Ny mpitandrina miza-draharaha Andriamifidy Miora no nitondra ny tenin’Andriamanitra araka ny Lioka 15 : 25-32 «  25Fa tany an-tsaha ny zanany lahimatoa; ary nony nody izy ka mby

11/02/2024 A la une . Fanompoam-pivavahana . Toriteny

Andeha hiaina @ fahamarinana

Alahady 11 febroary 2024, alahadin’ny Baiboly, mbola andinihina ny lohahevitra hoe « Mampitandrina @didiny Andriamanitra« , izay nitondran’ny mpitandrina Andriamasinoro Fidimalala ny hafatr’Andriamanitra araka ny Matio 5:20  » Fa lazaiko aminareo: Raha tsy mihoatra noho ny an’ny mpanora-dalàna sy ny Fariseo ny fahamarinanareo, dia tsy hiditra amin’ny fanjakan’ny lanitra mihitsy ianareo « 

04/02/2024 A la une . Fanompoam-pivavahana . Toriteny

Fankalazana ny faha-40 taonan’ny Asa fitoriana Filazantsara ho an’ny Zatovo sy Ankizy

Alahady 04 Febroary 2024, ankalazana ny faha-40 taonan’ny Asa fitoriana Filazantsara ho an’ny Zatovo sy Ankizy (AFFA), ka andinihin’ny FJKM lohahevitra vaovao @ity volana ity manao hoe « Mampitandrina amin’ny didiny Andriamanitra« . Ny mpitandrina Ranaivoson Andry no nitondra ny hafatr’Andriamanitra araka ny Jeremia 1 : 4-8 « Tonga tamiko ny tenin’NY TOMPO hoe:5Hatry ny fony ianao tsy

28/01/2024 A la une . Fanompoam-pivavahana . Toriteny

Fanokafana ny Jobily faha-75 taonan’ny Sampana Mpanazava sy Tily

Alahady 28 janoary 2024, fanokafana ny Jobily faha-75 taonan’ny Sampana Mpanazava sy Tily (SAMPATI), mbola andinihin’ny FJKM ny lohahevitra hoe « Lehibe ny voninahitry ny Tompo ». Ny mpitandrina Ranarimalala Nirina Harisoa no nitondra ny hafatr’Andriamanitra araka ny Matio 5 : 16 : « 16Aoka hazava eo imason’ny olona toy izany koa ny fahazavanareo mba hahitany ny asa

16/01/2024 A la une . Antso sy filazana

Hafatra ho an’ny Mpandray – fifidianana Diakona 2024

Mifarana ny alahady faha-28 janoary 2024 ny fanavaozana ny karatra hiatrehana ny fifidianana Diakona. Hamarino ary fa any aminao ny karatra maha-mpandray miloko fotsy. Raha toa tsy mbola manana ianao dia ento ny sary roa ny alahady faha-28 janoary hahafahana manavao ny karatrao.

14/01/2024 A la une . Fanompoam-pivavahana . Toriteny

Ny lanitra mamangy ny tany

Alahady 14 Janoary 2024, mbola andinihantsika ny lohahevitra hoe « Lehibe ny Voninahitr’Andriamanitra« , ka nitondran’ny mpitandrina miza-draharaha, Andriamifidy Miora, ny hafatr’Andriamanitra araka ny Lioka 9 : 28-36 Ny niovan’i Jesosy tarehy tao an-tendrombohitra.Mat. 17.1-13;Mar. 9.2-13.28ARY rehefa tokony ho havaloana taorian’izany teny izany, dia nitondra an’i Petera sy Jaona ary Jakoba Izy ka niakatra tany an-tendrombohitra hivavaka. 29Ary

07/01/2024 A la une . Fanompoam-pivavahana . Toriteny

Manavao ny fiainantsika Jesoa, manome fandresena ho antsika Jesoa

Alahady 07 Janoary 2024, alahady voalohany @ity taona ity, andinihina ny lohahevitra hoe « Lehibe ny voninahitr’Andriamanitra« , ka nitondran’ny mpitandrina John Rakotonirainy, SG ny FJKM, ny hafatr’Andriamanitra araka ny Matio 19 : 27-29 «  27Dia namaly Petera ka nanao taminy hoe: Indro, izahay efa nahafoy ny zavatra rehetra ka nanaraka Anao; koa inona ary no ho

31/12/2023 A la une . Fanompoam-pivavahana . Toriteny

Andriamanitra miandàny @ olony

Alahady 31 desambra 2023, alahady farany @ taona 2023, anatin’ny lohahevitra hoe « Ankalazao ny Mpamonjy« , nitoriana ny tenin’Andriamanitra araka ny Isaia 26 : 11-15  » 11Jehovah ô, avo ny tananao, nefa tsy jeren’ireo; Tsy maintsy hojereny ihany anefa ny  fahasaro-piaronao amin’ny olonao, ka ho menatra izy; Eny, afo no handevona ny fahavalonao. 12Jehovah ô, manorina fiadanana

25/12/2023 A la une . Fanompoam-pivavahana . Toriteny

Noely 2023 : Jesoa Kristy dia Mpanjaka

Krismasy 2023, Arahaba ry ilay nohasoavina, ny Tompo momba anao, « Ankalazao ny Mpamonjy ». Ny mpitandrina Prezida Synodaly Antananarivo Atsinanana, ALIOLIHARIMANARIVO Mahabo Saotra mpitandrina no nitarika sy nitondra ny hafatr’Andriamanitra araka ny Isaia 11 : 1-10 : Ny amin’ny famonjena hataon’Ilay Solofon’i Davida, sy ny hira fiderana hatao amin’izany1Ary hisy Solofo mitsimoka eo amin’ny fototr’i Jese,

24/12/2023 A la une . Fanompoam-pivavahana . Toriteny

Endre ny halalin’ny harena sy ny fahendren’Andriamanitra ary ny fahalalany!

Alahady 24 Desambra 2023, alahady farany @ advento @ity taona ity, ibanjinana ny lohahevitra hoe « Ankalazao ny Mpamonjy ». Ny mpitandrina miza-draharaha Andriamifidy Miora no nitondra ny hafatr’Andriamanitra araka ny ROmana 11 : 33-36 « 33Endre ny halalin’ny harena sy ny fahendren’Andriamanitra ary ny fahalalany! Tsy hita lany ny fitsarany ary tsy azo fantarina ny lalany! 34Fa