Nandalo vetivety fa namela dindo maharitra ny mpitandrina Rakotoharintsifa
MARTURIA VAVOLOMBELONA : Nandalo vetivety fa namela dindo maharitra !
Ny Talata 22 Desambra 2009 no nandao ny fanompoany tety an-tany Atoa RAKOTOHARINTSIFA Andrianjatovo. Mpitandrina ny FJKM Ambavahadimitafo izy izao nodimandry izao. Mpampianatra ao amin’ny Fakiolte Teolojika Ambatonakanga ( Testamenta Vaovao), sady Mpampianatra Sosiolojia momba ny Fivavahana eny amin’ny Oniversity Antananarivo. Ndriana no niantsoan’ny fianakaviany azy ary Tovo ho an’ny ivelany.
Fanokanana ho mpitandrina
Iray amin’ireo vitsy amin’ny Mpitandrina Malagasy to teny eran-tany izy, indrindra ny sehatry ny Testamenta Vaovao. Ary ny Fiangonana eto an-toerana dia nila hevitra taminy hatrany tamin’ny zavatra maro dia maro, satria dia olona manana fahaizana marolafy sady avo lenta ny lehilahy. Nahazo ny Doctorat en Théologie tao Lausanne Suisse izy ny taona 1996, ary laureate tamin’izany. Nanova ny fampianarana teolojia ny fisiany tao amin’ny Faculté noho ny fahaizana sy traikefa nananany.
Indreto aroso amintsika ny fijoroana ho vavolombelona ataon’ireo nifanerasera taminy:
RASENDRAHASINA Lala, Mpitandrina sady Filohan’ny FJKM: “Olona diso mahitsy loatra” amin’ny fitenenna izy, ary manana fahasahiana. Tsotra na malalaka loatra koa izy amin’ny fisehoana ivelany. Manakiana izy sady manome fanatsarana izay kianiny.
RAVALOMANANA Charlotte, Mpitandrina sady Sekretera akademika faculté de théologie: “tsy nahay nionona tamin’ny fikarohana hita izy, fa nikatsaka izany hatrany, indrindra ny fikarohana hita farany. Sarotiny amin’ny fanajana ny Soratra Masina izy, toy ireo biblistae maro. Nanamora ny asan’ny Faculté ny nananana azy tao.”
TEHINDRAZANARIVELO D. Emmanuel, Mpampianatra faculté: “olona tia boky tokoa izy, mianatra ary misokatra mihaino ny hafa. Rehefa voarany ny hevitrao, dia haveriny hiadiany hevitra aminao indray izany, fa tsy mionona amin’izay voarainy izy. Fikarohana ny tsara hatrany sy ny tsara indrindra izany toetrany izany.
RAKOTOVAO Andrianjaka, Mpitandrina nitaiza azy: nampianatra azy ho tia boky aho ary nilazany ny tenany taty aoriana ho “voalavo mihinam-boky”. Izy no nahatafita ireo zandriny 3 lahy, satria dia kamboty ray sy reny izy raha mpiomana ho mpitandrina: Ndriana (na Tovo). Ny fampianarana teny rosiana tao amin’ny Lycée Galliéni, no nandraisany karama tamin’izany.
RAMINO Paul, Mpitandrina, Mpampianatra azy: “Tamin’ny taona 1984 dia izaho no Mpampianatra voatendry hitarika azy tamin’ny asa fikarohana hahazoana ny mari-pahaizana Licence en Théologie, tao amin’ny Faculté Ambatonakanga: “L’avènement de Jésus-Christ selon Saint Paul”. Efa tsikaritro tamin’izany fa mpianatra ho lasan-davitra ity tovolahy ity. Ny zana-tohatra nodinganiny teo amin’ny fianarana sy fampianarana teolojia na teto Madagasikara na tany ivelany ary ny andraikitra notanany teto amin’ny FJKM, dia nanamarina izany”.
IRAKO ANDRIAMAHAZOSOA Ammi, Mpitandrina, Filohan’ny Synoda Lehibe roa farany: “Tamin’ny nitarihanay ny Synoda Lehibe, dia olona filan-kevitra mahatoky izy, saingy dia mpanitsy sady mahitsihitsy fiteny izay koa.”
RABEFIRENENA Velotiana, Mpitandrina vao nivoaka: “olona manam-panahy sy fahalalana izy, miezaka hatrany ny hitomboan’ny hafa amin’ny fahalalana ny Soratra Masina. Olona fakan-tahaka izy amin’ny fiezahana amin’ny fampitomboana ny tena sy ny hafa”.
MARTURIA VAVOLOMBELONA – 14 Janoary 2010
